بسم اللہ الرحمن الرحیم
حمد باری تعالیٰ
استاذ زمن علامہ حسن رضا بریلوی
کیوں کر اَدا ہو وصف خداے عظیم کا
جب بند ناطقہ ہے کلام و کلیم کا
چشم خیال اور ہوس جلوۂ جمال
بھولا ہوا ہوں واقعہ طور و کلیم کا
کیوں دل میرا دُکھائیں زمانے کے حادثات
تو ہے قدیم اور میں بندہ قدیم کا
اُس سے خود اُس کی ذات کی تشریح پوچھیے
اچھا علاج ہے یہ دماغِ حکیم کا
واجب کا ممکنات میں کیا ہو کوئی شریک
ممکن نہیں وجود عدیل و سہیم کا
ہیں امر و نہی لائقِ تسلیم بے دلیل
خالی حِکَم سے حُکم نہ ہو گا حکیم کا
کیوں میرے پاس آئیں فرشتے عذاب کے
مجرم تو ہوں میں اپنے غفور الرّحیم کا
پودوںمیں شاخیں شاخوں میں گُل گُل میں رنگ و بو
کیوں کر کہوں یہ عطر ہے سعی نسیم کا
اے جمع کرنے والے عظام رمیم کے
کب تک رہے گا حال پریشاں سقیم کا
بعد فنا حدوث و قِدم کا کُھلے گا حال
پوچھیں گے جب مزاج دماغِ حکیم کا
کج رَو کا راست باز کرے خوف کیا حسنؔ
طعمہ ہے مارِ سحر عصاے کلیم کا
Posts
Post a Comment